लोकलही मुंबईकरांची लाईफ लाईन आहे. दररोज लाखो प्रवासी मुंबई लोकलने प्रवास करत असतात. मध्य रेल्वे मार्गावर एक विचित्र घटना घडली आहे. आसनगाव लोकलमध्ये 20 लाख रुपयांची कॅश सापडली आहे. यामुळे प्रवाशांमध्ये खळबळ उडाली आहे. कल्याण रेल्वे पोलिसांनी ही रोकड हस्तगत केली आहे.
आसनगाव स्थानकातून लोकलने प्रवास करणाऱ्या प्रवाशाला एक बेवारस बॅग आढळली. या प्रवाशाने कल्याण रेल्वे पोलिसांना याची माहिती दिली. पोलिसांनी तात्काळ या बॅगेची तपासणी केली असता त्यात 500 रुपयांच्या नोटांचे बंडल आढळले. या बॅगेत जवळपास 20 लाखांची रोकड असल्याचे पोलिसांना आढळून आलं.
दरम्यान ही बॅग कोणाची आहे याबाबत कोणतीच माहिती अद्याप समोर आलेली नाही. रेल्वे पोलिसांनी सीसीटीव्ही आणि इतर तांत्रिक माहितीच्या मदतीने या बॅगेच्या मालकाचा शोध सुरू केला आहे. ही रोकड कोण, कुठे आणि कशासाठी घेऊन चालला होता याचा पोलीस कसून तपास करत आहेत.